Cultivate Food

Første fusgurbesøk på ein vegansk restaurant, her våga vi oss ut i nye og ukjente farvann! Dei som tidlegare har vanka på Løkka, veit mest sannsynleg kor Sultan låg og sørga nok greit når dei måtte stenge og gi plass til Espresso House. No har heldigvis Cultivate food teke over, og i hipsterånden som rår på Løkka er det altså vegansk som gjeld no.

Dette er ein stad som ikkje akkurat er det mest romantiske. Sidan disken er full av varmrettar, og nokre må bestillast, er det ikkje slik at ein kan få maten samstundes - det er altså meir ein kafè enn restaurant, slik vi ser det.

Vi gjekk for søtpotettaco, pizza, quinoasalat og gulrotsuppe med ymse toppings. Tacoen måtte lagast på bestilling og tok 20 min, medan dei andre matrettane stort sett var klare og ferdig med ein gong. (Her må ein stå i kø i kassa uansett kva ein vil ha.)


Karakter: M-
Pizzaen var grei nok, men smakte kanskje litt mikroaktig og vart litt kvalmande etterkvart så den vart ikkje eten opp, rett og slett. Salatane var rause i porsjonar og gode på smak, gulrotsuppa varma godt og tacoen var også god på smak. Veldig godt med litt sprø innslag i form av sprøsteikte kikertar midt i all søtpotet og guacamolen! Ein raus og rimeleg porsjon pommes frites var også på bordet, lite å klage på der.

Prisnivået er såpass lågt at her kan ein lett prøve fleire rettar utan å blakke seg! Både lasagnaen og bakt paprika såg freistande ut, så kanskje vi kan prøve på privaten ved eit seinare høve.

No har vi ikkje så mykje å samanlikne med når det gjeld vegansk mat, men både lokalet og maten verkar innbydande.

Kommentarer

---